Dagatalið List í 365 daga kemur ekki út í eiginlegri mynd í ár vegna ótal ástæðna. Í staðinn er sýning á verkum rúmlega hundrað listamanna sem eiga verk í dagatalinu í Listasafni Reykjanesbæjar frá 5. til 20. desember 2020.
Inngangur Jóns Proppé í dagatalið List í 365 daga sem kom út árið 2015 og sem á í raun enn vel við:
Dagatalið List í 365 daga færir okkur verk íslenskra myndlistarmanna og hönnuða, eitt á dag út allt árið 2015. Þannig getum við á hverjum degi notið þess að hafa uppi nýtt verk og smátt og smátt kynnst stórum hópi skapandi fólks sem lagt hefur þessu verkefni lið. Fjölbreytnin er mikil og dagatalið er í raun merkileg heimild um hið breiða svið sjónlista í íslensku samfélagi. Um leið og við njótum þessa listræna ferðalags gegnum árið getum við líka furðað okkur á því að svo margir skapandi listamenn skuli þrífast með jafn fámennri þjóð. Það væri að vísu ofsagt að allt þetta fólk nái að hafa atvinnu af sköpunarstarfi sínu. Líkt og annars staðar í heiminum þurfa flestir að stunda aðra vinnu meðfram sköpuninni og borga þannig í raun með sér þegar kemur að því að búa til verkin sem við hin fáum svo að njóta. Samt sem áður líta flest þeirra á listina sem sitt aðalstarf og leggja mikið á sig til að sinna henni. Það er auðvitað undur skapandi lista sem auðga líf bæði þeirra sem skapa og okkar hinna sem njótum. Það er auður sem ekki verður auðveldlega metinn til fjár og þegar við flettum dagatalinu á morgnana út allt næsta ár getum við glaðst yfir þessu ríkidæmi.
Jón Proppé
Málverkið Melencolia II – 1. hluti, byggir á áleitinni persónulegri reynslu, vísindalegum tilvitnunum og listsagnfræðilegum heimildum. Melencolia II – 1. hluti kallast á við verkið Melencolia I eftir Albrecht Dürer (æting 24 x 18,8 cm) frá árinu 1514.
Séð inn salinn í NV.
Séð inn salinn í NVV.
Melencolia II - 1. hluti var sett á daginn 18. nóv. 2020 í dagatalinu List í 365 daga, sem þó var aldrei fjölfaldað og prentað eins og til stóð. Af óviðráðanlegum 2020 ástæðum var ekki hægt að ráðast í útgáfuna í ár og var sýningin því haldin í Listasafni Reykjanesbæjar.
Séð inn salinn í SV.